ஐந்து பெண்கள்

                                                                                                      1

​

மலை உச்சியின் முகட்டில் காற்றில் அடித்து வரப்பட்ட மேகங்கள் கவிழ்ந்து கிடந்தன. பார்வைக்கு புலப்படாமல் எங்கேயோ பெய்த மழையில் இருந்து மண்வாசம் கிளம்பி நாசியை அடைத்தது. கவனமாக ஒவ்வொரு அடியையும் வைத்து யார் பார்வையிலும் படாமல் நிதானமாக நடந்தேன். மண்பாதையில் இறங்கும் முன் இருபுறமும் எந்த ஆள் நடமாட்டமும் இல்லை என்பதை உறுதி செய்த பின், விருட்டென ஓடி சென்று குடிலுக்கு பின்வாசலின் அருகில் இருந்த விளாமரத்தின் பின் ஒளிந்து பின் வாசலையே வெறித்தேன். நடந்து வந்த அலுப்பில் கொஞ்ச நேரம் கண்களை மூடி மனதைத் திறந்து காத்திருந்தேன்.

​

கல்லூரி வளாகத்தில் மர நிழலில் அமர்ந்து மவுத் ஆர்கன் வாசித்தபடி மஜுந்தார் ஒரு நொடி வந்து மறைந்தான். வழிந்த கண்ணீரை துடைத்தபடி கண்களை திறந்தேன். வானெங்கும் கருமேகங்கள் திரண்டு இருந்தன. கதவு திறக்கும் சத்தம் கேட்டு பார்வையை திருப்பினேன். செங்கண். சுற்றிலும் பார்வையால் துழவியவன் கண்களில் ஏக்கமும் ஏமாற்றமும் இருந்தது. என் கண்களில் புரையோடும் கண்ணீரால் அவன் உருவம் தெளிவில்லாமல் கரும்பு பூவை போல் தெரிந்தான். ஓடிச் சென்று அவனை வாரி அணைத்து முத்தமிட எத்தனித்த மனதை கட்டுப்படுத்திக் கொண்டேன்.

​

காட்டை உலுக்கியது போல் திடீர் மழை ஜோராகப் பெய்ய ஆரம்பிக்க, செங்கண் அவசரமாய் கதவை சாத்தி வீட்டினுள் சென்று விட்டான். நடந்து சென்று குடிலின் பக்கவாட்டில் இருந்த அடுக்களையின் ஜன்னலில் பார்வையை வீசினேன். மூப்பன் எதையோ சமைத்துக் கொண்டிருந்தான். பாலித்தீன் கவரில் சுருட்டி கொண்டு வந்த பணத்தை சத்தம் இல்லாமல் ஜன்னலில் உட்புறம் வைத்து அந்த இடத்தை விட்டு அகன்றேன். வழிநெடுகிலும் அழுதபடி நடந்து வந்த என் கண்ணீரை மழை துடைத்தபடி கூடயே வந்தது. செங்கனை மூப்பன் பார்த்துக் கொள்வான்.

நீண்ட தூரம் நடந்ததில் கால்கள் சோர்ந்து ஒரு மரத்தின் கீழே அமர்ந்தேன். காட்டை விட்டு வேகமாய் கடந்து போய்விட வேண்டும்.

ஒரு ஜீப் வரும் சப்தம் கேட்டு மரத்தின் பின்னே பதுங்கினேன். அது மிக அருகில் வந்து நின்றது. ஜீப்போட்டி வந்தவன் இறங்கினான். அவன் கண்ணில் படாமல் ஒளிந்தேன். என் முதுகின் மேல் ஒரு ஆண் கரம் பட அதிர்ந்து திரும்பினேன் . காக்கி உடையில் அவன். அவன் கண்கள் சிவந்து முழு போதையில் இருந்தான்.

" யாருடி நீ, இங்க என்ன பண்ற?"

" ஐயா டவுனுக்கு போவணும். மழைக்கு ஒதுங்கி இருக்கேன்"

" நீ எந்த ஊரு?"

" இங்கதான் பக்கத்துல"

" பக்கத்துலன்னா, ஊர் பேர சொல்லுடி?"

அமைதியாய் நின்றேன்.

" எதுக்கு ஜீப்பை பார்த்து ஒளிஞ்ச? உன் பையில என்ன வச்சிருக்க?"

" ஒன்னும் இல்லீங்கய்யா"

அவன் பையை என்னிடம் இருந்து பிடுங்கினான். அதே நேரம் இன்னொரு வண்டி வந்து நிற்கும் சப்தம் கேட்டது. ஜீப்போட்டி அந்த வண்டியை கிளம்பச் சொன்னான்.

"என்னடி இது?" பையில் இருந்து ஒரு நீண்ட கத்தியை எடுத்து என்னிடம் காண்பித்தான்.

" சுள்ளி வெட்ட ஐயா"

"ஏய் கிளம்பும்மா" காரில் இருந்து இறங்கிய பெண்ணை ஜீப்போட்டி விரட்டினான். இவன் என் மார் மீது கை வைத்து அங்கியை கிழித்தான்.

" ஐயா என்ன விட்டுடுங்க"

" இங்க என்ன நடக்குது?" அவள் கத்தினாள்.

" நீ கிளம்புடி"

ஜீப்போட்டி அவளை தடுத்தான்.

அவன் என் முலையில் வாய் வைக்க, அவனைத் தள்ளி என் பின் முதுகில் செருகி இருந்த கத்தியை எடுத்து அவன் கழுத்தை அறுத்தேன். அவன் அலறி விழ, "அடியே தேவுடியா சிறுக்கி" ஜீப்போட்டி ஜிப்பினுள் இருந்த கை துப்பாக்கி எடுத்து என்னை நோக்கி சுட எத்தனித்தான். அதே நேரம் அவள் அவனை எட்டி உதைத்து என்னை நோக்கி கத்தி எறிய சைகை செய்தாள். அடுத்த சில வினாடிகளில் அவனும் கழுத்தறுக்கப்பட்டு இறந்து போனான்.